يوم 25 يناير يا سيدي الفاضل يااللي بتقرا أنا عارف أنك زهقت منه و كرهت الرقم ده,لكن صدقني مش بسبببنا أحنا... "كان نفسنا كل حاجه تمشي زي ما أحنا عاوزين".. زي ما قال "تيتو".
لكن خليني كده أوضحلك فرق ما بين الواقع اللي أجبرنا عليه و الواقع اللي مصممين عليه.
- أولا: الواقع اللي أحنا مصممين عليه......علشان مزاولكش خلينا نسميه طموحنا :
1. كل الظباط اللي قتلوا الثوار وقفناهم عن العمل لحد ما نخلص محاكمتهم ....."متقليش أن اللي ماتوا قدام الأقسام بلطجيه طالما أنت أعترفت أنها ثورة يبقى هما اللي نجحوها ..لا أنا و لا أنت كنا حنقف قدام الظباط عند الأقسام و هما بيضربوا نار "
2. القضاء بتاعنا بقى مستقل ....."متقليش أنه مستقل....لأنه لو كان مستقل مكنش استنى كل ده ميحلش الحزب الوطني لحد ما قلنا أحنا نازلين في الشارع و قبل ما ننزل كالعاده يطلع قرار بحل الحزب الوطني ده مثال واحد علشان مصدعكش".
3. عداله أجتماعيه...مقلتلكش أني عايزها تاني يوم لكن على الأقل نلاقي خطه زمنيه توحد ربنا......"هو انت لما بتجيب صنايعي عندك في البيت بتقوله وقت ما تخلص كلمني ؟؟!!!!و لا بتزّن على دماغه لحد مايقولك حيخلص امتى؟...ده بيت ما بالك بلد"!!!
4. تطهيرالاعلام..... و أرجوك متقوليش أنه تتطهر....لأن لو دي الطهاره في نظرك يبقى أحب اقولك أمال النجاسه بالنسبه لك ايه؟!!!!......"أنا أسف على اللفظ ...لكن لما يبقى فيه مننا شباب زيهم زيك كل مشكلتهم أنهم من 25 يناير حسوا أنهم بيحبوا البلد ديه و فكسوا لكل حاجه في حياتهم وكل أملهم ينظفوا مصر ....أحب افرحك و اقولك أن فيه منهم قاعد في السجن منتظر المحاكمه العسكريه ...طالما متعرفش يبقى لسه الأعلام نجس".
5. كان نفسنا الجيش اللي حمى الثورة زي ما أنت و أنا فاهمين يحميها أكتر من كده ...."اللي كان واقف يوم موقعة الجملِ بيحمي الثورة و اللي كان واقف يوم المنطقه الشماليه يحمي الثوره و اللي كان واقف في العباسيه يحمي الثورة"...لكن من الواضح أن مفهوم الحمايه بيختلف من شخص لأخر.
6. وبدل ما يخّون شباب الثوره و يسمي ناس منهم بلطجية و يقبض على شبابها و يحاكمهم عسكري , كان كرّم جزء من الشباب أو أستعان بيهم في الوزارات أو سمع لكلامهم و مبادراتهم...... أو على الأقل يحاكمهم مدني.....بدل ما أحنا قاعدين نردح في كل مكان"لا للمحاكمات العسكريه للثوار".....عرفت بقى أزاي الجيش قدر يحمي الثورة.
ممكن يكون الكلام مش عاجبك أو حاسس أني بكدب عليك.....لكن طالما الشعب بعد 6 شهور كره الثورة و سقّف للجيش و هو بيفض الأعتصامات اللي بتطالب بحقوق الشعب نفسه..... يبقى أكيد في حد ما بيني و ما بينك مصلحته أنك تكره الثورة حتى و لو مش واخد باله ......لأنه عسكري.
- ثانيا: الواقع المجبرين عليه.........خلينا نقول "ما يحدث الأن":
1. اهمال واضح ...يزيد و يقل على حسب الضغوطات بأهالي الشهداء و مصابي الثورة و مفقوديها.
2. حركة تنقلات لظباط الداخليه مغيرتش كتير منها , و منهم المتورطين في قتل الثوار..."يعني على سبيل المثال :وائل الكومي مسّك مباحث الكهرباء في أسكندرية...شفت جمال أكتر من كده؟؟!!!!!".
3. لو أنت حرامي أو بلطجي و أتمسكت حتتحاكم مدني........لكن لا قدر الله لو من الثوار الشرطة العسكرية معاك و الأحكام العسكريه مستنياك.
4. موقف أقتصادي يتسم بالضبابية و عدم الوضوح....وعود بزيادات للعمال و المعاشات و نحن في الأنتظار......حد أدنى على الورق.......المستثمرين بيقدموا رجل و يأخروا رجل ....مشاريع “زويل و الباز” باتوا أضغاث أحلام.....زيت و بنزين و اسعار في الطالع......"معتقدش أن الناس اللي قاعده في الميدان هما اللي غلّوا الأسعار و منفذوش وعودهم لحد دلوقت"
5. بقايا اعلام مبارك الى الأن .....تمجيد الحاكم و تصدير الطرشه لأي حد من الثوار بيضّرب أو بيتحاكم.
6. لو قاعد في بيتك مش حتاخد حاجه .....لازم تجهز شنتطك و تطلع على الميدان يا مسيره...يا اعتصام ......"خد بالك الأعتصام بقى ممنوع لأن الجيش هو المعتصم الأن ,حتى لو رايح تفطر فمن الواضح أن فطار التحرير و الميادين دلوقت حرام".
أكيد الرؤيه وضحت شوية و عرفت احنا ليه كنا معتصمين و أيه اللي احنا عاوزينه و اللي صنّاع القرار عايزينه ,و كفاية عليك كده...الهدف مش أني أفهمك ولا أعلمك.......... أنا بس مفيش عندي اعلام و لا جرايد علشان أكلمك, و أوّضحلك الفرق بين الحقيقة الثورية و الخيال الذي يحدث.
